Saturday, 23 May 2009
-
2009年5月23日 星期六 雨
期盼已久, 天文台講左好耐既一場大雨今日終於到落左. 成個下晝個天都係灰矇矇一片, 但卻掃走左過去幾星期既酷暑. 尼個月生活歸於平淡, 扭開電視講真有時都幾開心(黑心d講句), 乜乜大公司裁員100人, 某某大公司裁員200人, 感謝上帝安排我係尼個時間失業, 咁多人無野做我都唔係好差姐
昨晚一夜無眠, 話說臨訓前小狗突然nut牙.
平時習慣臨訓前掃掃小狗say個night先訓, 昨晚抱上手唔多妥. 點解會咯咯聲既? 望左陣, 唔會掛......nut牙?! 即時戴手套伸隻手指入佢個口望望, 成個身打曬冷震.......隻牙係個口入面半天吊, 仲流埋血=.= 猶記得7年前小狗拔牙, 個時獸醫仲話要開埋消炎止痛葯俾佢. 尼次乜都無, 霎時腦過閃過一炸傷口處理不當既後果, 咩心瓣炎腦膜炎..... 而家最驚佢發燒. 小狗今年已經18歲, 月初帶佢睇獸醫個醫生都幾乎嫌佢老唔多望佢個隻. 點搞a=.="....望望個鐘, 1:45am, 今晚唔駛訓了.
最後顧不得小狗掙扎, 恨心"啪"一聲... 霎時全世界靜了. 小狗望住我, 呆左; 我都望返佢, 呆左. 好, 訓覺.
今朝起身小狗跳下跳下無咩野, 好似咩事都無發生過一樣, 但個身仲興. 喂! 退左燒未ga
點都好, 還是祈禱主唔好俾佢有事. 過去幾年鮮有時間陪陪小狗, 直到而家留係屋企, 先發現小狗已經差唔多了. 月初帶佢睇獸醫, 做曬心理準備打算送佢一程, 點知獸醫話佢無野, 仲食得訓得有排挨. 就係咁, 小狗就逃過一劫, 氣數未盡la.
最近教會團契其中一次主題講戀愛, 基於心虛我罕有地做左逃兵. 但開始諗尼個問題......剛才小狗係我懷中訓著左, 最高難度係佢鍚我鍚到訓著左, 連抱高左佢都唔知個頭半天吊, 唔知真係以為佢死鬼左嚇鬼死......好可愛
雖然朋友多番解釋拍拖戀愛係點點點, 似終覺得唔太合理. 但如果將小狗當成伴侶, 開始明白一點點, 這就是愛.
愛是恆久忍耐、又有恩慈．愛是不嫉妒．愛是不自誇．不張狂．不作害羞的事．不求自己的益處．不輕易發怒．不計算人的惡．不喜歡不義．只喜歡真理．凡事包容．凡事相信．凡事盼望．凡事忍耐。愛是永不止息． (哥林多前書13:4-8)
謝謝你小狗, 讓我學識愛
雖然我睇唔到野, 但我知你影緊我ga~ 
兩個好少咁fd ga wo, 咩事呢? 
唔好影la, 人地訓緊ga!
-
recommend
- recs 0
-
share
-
email
- sent 0
Post a Comment